“Педагогикалык ишмердүүлүктөгү чыгармачылык, инновация” темасындагы онлайн Эл аралык конференция

Талыкпаган эмгектин жыйынтыгы.
2025-жылдын 27-февралында Казахстан Республикасынын Усть-Каменогорск шаарындагы “ Кумаш Нургалиев атындагы Жогорку колледжи” уюштурган СССРдин Эл мугалими Кумаш Нургалиевдин 100 жылдыгына арналган “Педагогикалык ишмердүүлүктөгү чыгармачылык, инновация” аттуу республикалык окуу боюнча онлайн форматтагы Эл аралык конференция болуп өттү. Бул онлайн конференцияга Казахстан, Кыргызстан, Татарстан өлкөлөрүнөн 180 катышуучу катталып күч сынашты. Акматкан Молдогазиев атындагы Бишкек медициналык колледжинин окуу бөлүмүнүн башчысы Элдан Данилович Данилов “ Акматкан Молдогазиев атындагы Бишкек медициналык колледжинде билим берүүнүн сапатын жогорулатуудагы инновациялык технологиялар” аттуу макаласы менен катышып, кыл чайнашкан мелдеште калыстардын чечими боюнча байгелүү орунду жеңип, үчүнчү даражадагы Диплом менен сыйланып, Сертификатка ээ болду. Акматкан Молдогазиев атындагы Бишкек медициналык колледжинин окуу бөлүмүнүн башчысы Э.Д.Данилов, буга чейин болуп өткөн бир нече Эл аралык илимий-практикалык конференцияларга катышып, баш байгелерди жеңип жүргөнү менен таанымал болгон, келечеги кең жаш окутуучулардын бири болоруна ишенем арттырган кесипкөй мыкты адис экендиги, окуу жайдын жалпы жамааты үчүн чоң сыймык. Кыргызда “Саргара жортсоң, кызара бөртөсүң” деген макал бар эмеспи, келечек заманбап алдыңкы илимий технологиялык окуу процесстерине байланышкан доордон кабар берип турат окшобойбу. Бул жааттан алганда, 97 жылдык бай тарыхы бар, республикадагы эң алгачкы окуу жайлардын экинчиси болгон, эки ордендүү Акматкан Молдогазиев атындагы Бишкек медициналык колледжи учур талабына ылайык, алдыга карай кадам таштоо үчүн белсенип киришүүгө даяр.
Сөз аягында, Элдан Данилович Даниловго чың ден-соолук, узун өмүр, ишине ийгилик каалоо менен бирге, окуу жайыбыздын желегин желбиретип жаңы жеңиштерди жаратышына тилектеш экенибизди жалпы эмгек жамаатынын атын билдиребиз.
Жеңиш куттуу болсун!

Акматкан Молдогазиев атындагы Бишкек медициналык колледжинин директорунун мамлекеттик тил боюнча орун басары Мырзатай Ырсалиевич Шатманалиев.
Бишкек шаары.2025- жыл 3-март.